ಯುಗಾದಿ ಹಾದಿ

ಹಳೆಯ ಯುಗವು ಕಳೆದು
ಹೊಸ ಯುಗದ ಬೆಳಕು ಹರಿದು
ಬರುವ ನಮ್ಮ ಯುಗಾದಿ
ಪ್ರತಿ ಚೈತ್ರದ ಪಾಡ್ಯದಿ

ಮನೆಮನೆಗಳಲಿ ತಳಿರು ತೋರಣ
ಅಡಿಗೆ ಮನೆಯಲಿ ಒಬ್ಬಟ್ಟ ಹೂರಣ
ಅಂಗಳದಿ ರಂಗೋಲಿ ಚಿತ್ತಾರ
ದೇವರಿಗೆ ಹೂ ದೀಪಗಳ ಅಲಂಕಾರ

ತಿನ್ನುವೆವು ಬೇವು ಬೆಲ್ಲದ ಮಿಶ್ರಣ
ಜೊತೆಗೆ ಪಂಚಾಂಗ ಶ್ರವಣ
ಬದುಕು ಕಷ್ಟ ಸುಖಗಳ ಸಂತೆ
ಈ ವರುಷ ಮಳೆ ಬೆಳೆ ಹೇಗಂತೆ?

ಹೊಸ ಬಟ್ಟೆ ಧರಿಸಿ
ನವ ಸಂವತ್ಸರ ಸ್ವಾಗತಿಸಿ
ಆರೋಗ್ಯ ಸಂತೃಪ್ತಿ ನೆಮ್ಮದಿಯ ಭರವಸೆಯಲಿ
ಹೊಸ ವರುಷದ ಸಂಭ್ರಮದಲಿ

ಆಚರಿಸುವ ಬನ್ನಿ ಯುಗಾದಿ
ತುಳಿಯುವ 'ಮನ್ಮಥ'ನ ಹಾದಿ!

ಮನ್ಮಥನಿಗೆ ಸ್ವಾಗತ

ಬಂದಿತು ಮತ್ತೆ
ಯುಗಾದಿ
ಬನ್ನಿ ಆಚರಿಸುವ
ಹಬ್ಬ ಹರುಷದಿ

ಕಳೆದ ಸಂವತ್ಸರದ
'ಜಯ'ಭೇರಿ ನೆನಪಲಿ
'ಮನ್ಮಥ'ನ ಆಗಮನದ
ಸಂತೋಷದ ಹುರುಪಲಿ

ಬನ್ನಿ ಬಂಧುಗಳೆ
ಸ್ವಾಗತಿಸುವ ಹೊಸವರುಷವ
ಬನ್ನಿ ಸ್ನೇಹಿತರೆ
ಆಚರಿಸುವ ಹಬ್ಬವ

ಮನೆ ಮನೆ ಬಾಗಿಲಲಿ
ತಳಿರು ತೋರಣ
ಅಡಿಗೆ ಮನೆಯಲಿ
ಒಬ್ಬಟ್ಟು ಹೂರಣ

ಉಗಾದಿಯಲಿ ತಿನ್ನುವೆವು
ಬೇವುಬೆಲ್ಲ
ಬದುಕಲಿ ಕಷ್ಟ ಸುಖ
ಸ್ವೀಕರಿಸುವೆವು ಎಲ್ಲ

ಹೊಸ ಬಟ್ಟೆ ಧರಿಸಿ
ಹಬ್ಬದೂಟ ಭಾರಿಸಿ
ಈ ವರ್ಷ
ಆರೋಗ್ಯ ಆಯಸ್ಸು ನೆಮ್ಮದಿಯ
ತರಲೆಂದು ಬಯಸಿ

ಬಂದಿದೆ ಮತ್ತೆ
ಯುಗಾದಿ
ಬನ್ನಿ ಎಲ್ಲರೂ ಕೂಡಿ
ಆಚರಿಸು ಹಬ್ಬ ಹರುಷದಿ

ನಿಜರೂಪ

ಸುಳ್ಳಿನ
ಸುಳಿವು
ಕೊಡದ
ಸತ್ಯ
ಸತ್ತಂತೆ
ನಟಿಸಿದರೂ
ಅದೆಷ್ಟು
ದಿನ
ನಾಟಕ?

ಒಂದೊಮ್ಮೆ
ತೆರೆ
ಬೀಳಲೇ
ಬೇಕಲ್ಲವೇ?

ನೆನಪು ಮರೆವುಗಳ ನೆಪ

ನಿನ್ನ ಮರೆಯಲು
ಯತ್ನಿಸೆ
ಆ ಪ್ರಯತ್ನದಲ್ಲೇ
ನಿನ್ನ ನೆನಪು
ಕಾಡುತ್ತೆ..

ನಿನ್ನ ನೆನಯೋದು
ಬೇಡವೆಣಿಸೆ
ಮರೆತಿದ್ದರಲ್ಲವೆ
ನೆನಪು
ಬೇಡವೆನುವ ಮಾತು?

ಒಂದಲ್ಲ ಒಂದು
ನೆಪ
ನಿನ್ನ ಗುಂಗಿಗೆ!

ಸುಳ್ಳಿನ ಸರಮಾಲೆ

ಒಂದೇ
ಒಂದು ಸುಳ್ಳು
ಸಣ್ಣ ಸುಳ್ಳು
ಬಣ್ಣವಿರದ ಸುಳ್ಳು

ಹಸಿ ಸುಳ್ಳೋ
ಬಿಸಿ ಸುಳ್ಳೋ
ಬಿಳಿ ಸುಳ್ಳೋ
ಎಳೆ ಸುಳ್ಳೋ

ಒಂದು
ಸುಳ್ಳು ಮಚ್ಚಲು
ಮತ್ತೊಂದು,
ಮಗದೊಂದು

ಸುಳ್ಳುಗಳ
ಸಾಲುಗಳು
ಸಾಲುಗಳ
ಮಾಲೆಗಳು

ಸುಳ್ಳಿನ ಸರದಾರನಾಗಲು
ಸಾಕು ಒಂದೇ
ಒಂದು ಸುಳ್ಳು
ಸಣ್ಣ ಸುಳ್ಳು!

ಆಧುನೀಕರಣ

ಖಾಲಿ ಕೊಡಕ್ಕೆ
ನಿಂತಲ್ಲಿ ನಿಲ್ಲಲಾಗದೆ
ಉರುಡುತ್ತಾ
ಸದ್ದು ಮಾಡೋ
ಬಯಕೆ

ಅರ್ಧ ತುಂಬಿದ
ಕೊಡವೋ
ಅರೆಬೆಂದ ಜ್ಞಾನ
ತುಳುಕಿಸುತ್ತಾ
ಪ್ರದರ್ಶಸೊ
ಆಸೆ

ತುಂಬಿದ ಕೊಡ
ಯಾರಿಗಾದರು
ನೀರಿನ ಅಗತ್ಯವೇ
ಎಂಬ ನಿರೀಕ್ಷಣೆ..
ನೀರುಣಿಸಿ
ಮತ್ತಷ್ಟು ನೀರ
ತುಂಬಿಕೊಳ್ಳೊ
ಉತ್ಕಟ ಇಚ್ಛೆ

ಈಗ ಕೊಡವಿದ್ದರೆ
ತಾನೆ
ಸದ್ದು ಮಾಡಕ್ಕೆ
ತುಳುಕಕ್ಕೆ
ತುಳುಕದಕ್ಕೆ

ಈಗೇನಿದ್ದರೂ ನಲ್ಲಿ
ಬೇಕಿದ್ದಲ್ಲಿ
ನಲ್ಲಿ ತಿರುಗಿಸಿ
ಬೇಕಾದಷ್ಟ ನೀರ
ಹಿಡಿದು
ಬಾಯಿ ಬಂದ್
ಮಾಡಿದರಾಯಿತು

ಹೆಚ್ಚೆಂದರೆ
ಆಗಾಗ
ನಲ್ಲಿಯಿಂದ
ತೊಟ್ಟಿಕ್ಕೊ ನೀರು
ತೊಟ ತೊಟ ಸದ್ದು!

ಅಸ್ತಿತ್ವ

ತಾನೇ ಸರಿ
ತನ್ನದೇ ಖರೆ
ಎನುವ ಜನ
ತಮಗೆ ತಾವೇ
ಸಾಬೀತು ಪಡಿಸುವ
ನಿರಂತರ ಪ್ರಯತ್ನವೇ?