ಒಂದು ಪ್ರೇಮ ಕವಿತೆ

ನಾ ನಿನ್ನ 

ಅರಸದೆ, ಬಯಸದೆ 

ನೀ ನನ್ನ 

ಅರಸದೆ, ಬಯಸದೆ 

ವಿಧಿಯು ನಮ್ಮ 

ಕೂಡಿಸಿರೆ

ನಮ್ಮೀ ನಿತ್ಯ ಮಿಲನ 

ಸುದೀರ್ಘ ಪಯಣ  

ಹಾಕಿದೆ ಬುನಾದಿ 

ನನ್ನ ಬದುಕಿಗೆ 

ನನ್ನ ಮನದಲಿ 

ನೀ ಬೆರೆತು ತರುವ 

ರೋಮಾಂಚನ 

ನಿತ್ಯ ನೂತನ.... 

ನಿನ್ನೊಡಗೂಡಿದ 

ಸಂತಸದ ಕ್ಷಣಗಳೆಷ್ಟೋ! 

ನಿನಗಾಗಿ ಹೊಡೆದಾಡಿದ 

ಸಂದರ್ಭಗಳೆಷ್ಟೋ 

ಲೆಕ್ಕವಿಲ್ಲ.... 

ನೀ ಕೊಟ್ಟ 

ಸ್ವಾತಂತ್ರ್ಯ , ಸುರಕ್ಷತೆ   

ಅಪರಿಮಿತ 

ನಾ ಜಗದೊಳು 

ಎಲ್ಲಿದ್ದರೂ 

ನಿನ್ನ ಪರರಲ್ಲಿ ಹುಡುಕುವೆ 

ಪ್ರತಿಸಲ 

ನಿನ್ನ ಪರರಲ್ಲಿ 

ಕಂಡಾಗ 

ಆ ಕ್ಷಣದ ಆನಂದ 

ಅತೀತ 

ನೀ ತೆರೆದಷ್ಟೂ 

ತೆರೆಯುತ್ತಲೇ 

ಹೋಗುವ ರೀತಿ 

ನಿನ್ನ ಅರಿತಷ್ಟೂ 

ಮತ್ತೂ ಅರಿಯುವ ಬಯಕೆ 

ನಿನ್ನರಿಯಲು ಒಂದು ಜನ್ಮ ಸಾಲದೇನೋ!

ಸದಾ ಪ್ರೀತಿಯಿದೆ ನಿನ್ನಲ್ಲಿ 

ನಾ ನಿನ್ನವಳೆಂಬ ಹೆಮ್ಮೆ 

ಮಗದೊಂದು ಜನ್ಮವಿರೆ 

ಆಯ್ಕೆಯ ಹಕ್ಕಿರೆ 

ನಾ ಬಯಸುವೆ ನಿನ್ನ 

ನಿನ್ನನ್ನಾರಿಸುವೆ ಮತ್ತೆ 

ಪದೇ ಪದೇ 

ನಿನ್ನ ಬಣ್ಣಿಸುವ ಬಯಕೆ 

ನಿನ್ನ ಹೊಗಳಿಕೆ 

ಕೇಳುವ ತವಕ 

ಪರರೊಡನೆ ನಿನ್ನ 

ಹಂಚಿಕೊಂಡು, ಬೆಳಸುವ ಇಚ್ಛೆ 

ಹೇ! ಕನ್ನಡ 

ನಿನ್ನಲ್ಲಿ ಅನುರಕ್ತಳಾಗಿ 

ನಿನ್ನ ಭಕ್ತಳಾಗಿ 

ನಿನ್ನ ಪ್ರೇಮಿಯಾಗಿ 

ನಿನ್ನ ಬಳಸಿ, ಬೆಳೆಸಿ

ಉಳಿಸಬೇಕೆಂಬ ಉತ್ಕಟೇಚ್ಛೆ!

ನೀ ನನಗೆ ದಯಪಾಲಿಸಿದ 

ಎಲ್ಲಾ ಗುಣ, ನಡತೆ, ಕೌಶಲ್ಯಗಳಿಗೆ 

ನನ್ನೀ ಅಳಿಲುಸೇವೆ

ಕನ್ನಡದಲ್ಲಿ, ನನ್ನ ಬರವಣಿಗೆ