ಹೂವು ಹಣ್ಣು ಕೊಟ್ಟು 

ಹಕ್ಕಿಗಳಿಗೆ ನೆಲೆಕೊಟ್ಟ

ಆ ಮರ, ಮಾತಾಡಿಲ್ಲ 

ಗಿಡಮರಗಳಿಗೆ ಆಶ್ರಯವಾಗಿ 

ಪ್ರಾಣಿಗಳ ಪೋಷಿಸಿದ 

ಆ ಬೆಟ್ಟ ಬಡಬಡಿಸಿಲ್ಲ 

ಮಾಡಿದ್ದಕ್ಕಿಂತ ಮಾತನಾಡಿದ್ದೇ  ಹೆಚ್ಚು 

ನಿನ್ನ ಅರಿವ ಕಣ್ಣು ತೆರೆವುದೆಂದು - ಅಲ್ಪಜ್ಞೆ 

                                    - ಅನಿತಾ ನಾಡಿಗ್ 

ಗುಡ್ಡವು ನಲುಗುವುದೆ 

ಇಲಿ ಹೆಗ್ಗಣಗಳ ಕೊರೆತಕ್ಕೆ 

ಬೆಟ್ಟವದು ಬೆದರುವುದೆ 

ಝರಿಯ ಮೊರೆತಕ್ಕೆ 

ಆಶ್ರಯ ಕೊಟ್ಟ ತೃಪ್ತಿ 

ಗುಡ್ಡಕ್ಕೆ  

ಆಸರೆಯ ನೆಪದಿ ತಂಪ 

ಹೀರುವ ಸುಖ ಬೆಟ್ಟಗಳಿಗೆ 

'ಬದುಕು, ಬದುಕಲು ಬಿಡು' 

ಎನುವುದೇ ಜಗದ ನಿಯಮ 

ಅರಿತರೆ ಒಳಿತು, ಅರಿಯದಿರೆ ತೊಡಕು - ಅಲ್ಪಜ್ಞೆ !