ಕಪ್ಪು ಬಿಳುಪು ಚಿತ್ರ ಪಟ

ಗೂಡು ಸ್ವಚ್ಚ ಮಾಡೊ

ಕಾರ್ಯದಿ ಸಿಕ್ಕ ಆ 

ಕಪ್ಪು ಬಿಳುಪು ಚಿತ್ರ ಪಟಗಳು...

ಸಾವಿರ ವಿಷಯ 

ಸಾರುತಿದ್ದವು...

ಸಾದಾ ಸೀರೆಯಲ್ಲೂ 

ಅಮ್ಮನ ಸುಂದರ ಮುಖ

ವರ್ಷಗಳುರುಳಿದರೂ 

ಬದಲಾಗದ ಅಪ್ಪನ ಆ ಪೋಸು

ರಜೆಯಲಿ ಅಜ್ಜಿಮನೆಗೆ

ಮೊಮ್ಮಕ್ಕಳ ದಾಳಿ

ಇಳಿವಯಸ್ಸಿನ ಅಜ್ಜಿತಾತರಿಗೆ

ನಾವು ಮಾಡಿದ ಹಾವಳಿ

ಅಜ್ಜಿ ಮನೆಯ ಆ ಗಡಿಯಾರ,

ಬೀಸೋಕಲ್ಲು, ಉರಿವಲೆ

ಸಾರುತಿರುವವು ಸಾವಿರ ಕಥೆಗಳ...

ಸಂಬಂಧಗಳ ಸವಿನೆನಪುಗಳ...

ಮೊಮ್ಮಕ್ಕಳೆಲ್ಲ ಒಟ್ಟಿಗೆ ಕೂತು

ಹಾಕಿಸಿಕೊಂಡ ತುತ್ತು

ಊಟಬೇಡವೆಂದವರು

ಇದ್ದ ಅನ್ನವನ್ನೆಲ್ಲಾ ಖಾಲಿ ಮಾಡಿದ ಹೊತ್ತು!

ಆ ಮೆಂತ್ಯದ ಹಿಟ್ಟು, ತಂಗಳ ಮೊಸರನ್ನ

ಅಜ್ಜಿಯ ಕೈ ಸಾರು

ತಾತನ ಕೈ ಬೋಂಡ

ಎಲ್ಲರೂ ಒಟ್ಟು ಸೇರಲು

ಅಜ್ಜಿ ತಾತ ನೆಪಮಾತ್ರವಾಗಿರಲು

ಬಣ್ಣಗಳಿಲ್ಲದ ಬದುಕಲ್ಲಿ

ಸಂತೋಷ ನೆಮ್ಮದಿಗಳೆಷ್ಟಿತ್ತು! 

ಈಗ ತರಾವರಿ ಬಣ್ಣಗಳು...

ಸಂಬಂಧಗಳ ಬೆಸೆಯಲು

ಪುರುಸೊತ್ತಿಲ್ಲದಷ್ಟು ದೊಡ್ಡ 

ಬಣ್ಣದ ಲೋಕ!!

ಉದ್ಯೋಗದ ಸುತ್ತ ಬಣ್ಣ ಬಳಿದು

ಸಂಬಂಧಗಳ ಕಪ್ಪು‌ಬಿಳುಪು ಪ಼ೋಟೊ

ಎಫ಼್ ಬಿ, ವಾಟ್ಸಾಪ್, ಇನ್ಸ್ಟಾಗ್ರಾಮ್ 

ಚೌಕಟ್ಟಿನಲ್ಲಿ ಭದ್ರ!!