ತಿಂಗಳ ಆ ಮೂರು ದಿನಗಳು
'ಅವಳು ಒಳಗಿಲ್ಲ'
ಅರಿಶಿನ ಕುಂಕುಮಕ್ಕೆ
ಕರೆದರು ಪಕ್ಕದಮನೆಯವರು,
'ಮಗಳಿಗೂ ಹೇಳಿ, ಕುಂಕುಮಕ್ಕೆ'
'ಅವಳು ಒಳಗಿಲ್ಲ'
ಮದುವೆ ನೆನಪಿಸಿದರು
ಅತ್ತೆಯ ಅಣ್ಣ
'ನಾಳೇನೇ ಬಂದುಬಿಡು,
ಸೊಸೆನೂ ಕರೆದುತಾ'
'ಅವಳು ಒಳಗಿಲ್ಲ'
ದೊಡ್ಡಪ್ಪ ಫೋನಾಯಿಸಿದರು
'ನಾಳೆ ಪೂಜೆ ಕಣೋ,
ಹೆಣ್ಮಗಳನ್ನೂ ಕರ್ಕೊಂಡು ಬಾ'
'ಅವಳು ಒಳಗಿಲ್ಲ'
ಅಜ್ಜಿ ಮನೆಯಲ್ಲಿ
'ಗೆಟ್ ಟುಗೆದರ್, ಎಲ್ಲ ಬನ್ನಿ'
'ನಾವು ಬರ್ತೀವಿ.
'ಅವಳು ಒಳಗಿಲ್ಲ''
ತಿಂಗಳ ಆ ಮೂರು ದಿನಗಳು
'ಅವಳು ಒಳಗಿಲ್ಲ'
ಈ ಕಡೆ ಒಳಗೂ ಇಲ್ಲ
ಹೊರಗೆ ಹೋಗೋ ಹಾಗು ಇಲ್ಲ!
ಅತ್ತಲೂ ಇಲ್ಲ ಇತ್ತಲೂ ಇಲ್ಲದ
ತ್ರಿಶಂಕು ಸ್ಥಿತಿ - 'ಅವಳು ಒಳಗಿಲ್ಲ'
